::: Champhai II :::


CHAMPHAI CHANCHIN Phek II-na

DSC06310 A mawi hluan e…Khuavelah hian chhingzo awm hian kan ring bik nem le!

Vai rawn len hnu hian Manding Sap (Commander Saheb) leh Bawrhsap Pu Tarmita (John Shakespeare I.A 1898 April 1,ah a lo chhuak a)khan thingtlang mite chu lei leh dan a zirtir a.Midumte lei an leh tir a,chumi hmun chu ‘midum phai’ tih ala ni reng.Tuna Lungdar phai hi chung hunlai chuan Rairuang leh Pumphir hlir in a khat a,tui pawh a tlep in a luang thin.Sawrkar in bawng te a pe a,leileh na tur engkim a tihsak a.A hlawk zia leh a that zia hi mi tamtak in an rawn hria a,leilet nei pawh an rawn pung zel a.Champhai chanchin han sawi hi chuan a awmzia leh a amwi zia hi sawi loh theih loh a ni.Pathian in hetiang ang tak a ram nuam leh mawi alo siam hi a luah hmasa Hmar ho an lo ni hi an vannei ngei mai.A hmingah Zawlphai ti a koh nimahsela tlang sang tak a zawl awm a ni a,chuvangin sik leh sa a nuam tawk hle a,ruah tui tamtak leh thlifim  tleh heuh heuh na hmun a ni a.Thlasik lai phei hi chuan vur hi a var tuar bawk a,a kiang a phai tereuhte (tuna Venglai thlanmual mawng lama awm ta khu) Keilungliak (Keilungliah chu a hming tak tak ni loin kan ‘modern hming’ pek mai mai a ni) an tih ah phei chuan thlasik vanglai hian Luidung tui hi patling dawl khawp in a khal thin a ni.

 

            He phaizawlah hian nula leh tlangvalte hi a nawmna tem turin an leng dul dul thin a,tunlai tawng takin zawnglai nge zawnlai ho Luck-na hmun tak a ni.A kawp te te leh a huhova Picnic na leh intawllenna a ni deuh ber.Champhai zawl kiang a Chhawkhlei par leh Keifang rah han lawh hunlai phei chuan a nuam in amawi bawk a,tar te te pawh hian kawppui tur an zawng ruai mai an tih chu[h].Hun inher in a rawn her chhuak hi a mawi lai leh a nuam lai tak emaw tih tur vek in a mawi in a nuam vek a ni.Heng a mawinaw leh a nawmna han thlirin Mizoram chauh pawh nilo,khawvel ramtinah a khum thei an awm bik lo vang.A boruak hi a thengthawin a hi anuam hle a,rilru leh ngaihtuahna hi a zang haih mai a ni.Phaizawla tlang te tak te te lo chhuak te leh a vela tlang kham mawi tak tak leh a bawm tu parmawi leh thingte hian khawvel mawina hi a lantir em em a ni.A kiang vel a parmawi leh thing Chhawkhlei leh Ainawn,Senhri leh Nauban chi hrang hrang,THingsir,Far,Thingsarua leh Fartuah te hi thlir ninawm loh in a khat a ni.Hun inher zel in a mawina chu chi hrang hrangin a rawn her chhuak a ni.Thallai chuan romeiin Tuipui leh Tiau tuikang nghak niawm takin a rawn bawh a,zam chiai in a lunglen thlak khawp mai.Heng ram mawi leh nuam ah hian hmanlai Mizo nula leh tlangval ho chuan Sikpui lamin an lo lam hulh hulh mai a,hlim em em in Pathianin ram mawi tak a siamah hian an lam a,an insuih kual a,an ke te an then a,nunkhaw nawm nan an lo hmang a ni.An lamna chu tun thleng pawh hian hmuh tur ala awm,an lungphun leh khuangpu thutna pawh ala awm reng!Tunlai hun nisela chuan an lai thla,nula ho biang tai sentut a an thlan tui far kuang kuang lai thlalak a chakawm ngawt mai.Tunlai en chuan mahni tawkah lung a awi ngei mai.Champhai mawina leh a nawmna hi Hmar leh Mirawng hoin lo chen hle tawh mahse,a mawina hi ala bo chuang lo.August thla kan han en vel chuan nimina siam zawh hlim ang main ala hring dup mai a ni.Tin,khawchhak lam hi a mawi hle reng a,Burma ram nena inrina Tiau lui a luang a,a piah ah Rihdil a ni.Champhaia Hmar an awmlai hian Rihdilah hian Leiriho an awm bawk a.Upa hoin,’Leiriho an awm avangin a hmingah Rih an tit a ani an ti alawm’.Heng khawchhak ram hi a mawiin lung pawh a ti leng hle.Champhai hi chu a mawi zual bik niin a lang.Kan pi leh pute pawhin Mitthi kalkawng tura an lo ngai hi awm ve tak chu a ni.Hmanlai chuan Mitthi tawh phawt thlarau chu Rihdil-ah khian an kal an ti a,hla pawhin an phuah reng a:

Rih Dil Rihlipui….thlafam leng kaina!

                        ‘Mawizual e chhaktiang ram khi,

                        Thlafam kaina rih tlangpui khi’

an lo ti alawm.Champhai zawl khi hmanlai chuan ramsakawlh tak tak te leh pasaltha ho hmingthang tak tak te,par mawi tak tak te lo awmna a ni thin a.Tunah chuan buh hmun mawi tak tak te chuan a lo bawk ta zawk a ni.Sawrkarin leilet tan tura a tirh lai chuan thingtlang lo neih hi ala hlawk si a,an thawk tha duh vak lo va,Mirawng ho kan pe leh mai dawn e,an ti thin.Leileta thawk tur mi an vai hial thin a ni.Chung lai chuan mi an indaih lo va,leilet siam chhun pawhin kumhnihte an han siam a,an bang leh mai thin.Chunglai chuan lo pawhin man a nei tam vak lo a,an kut ngeiin bawngtuthlawh an lek thin a,hunte a hank al zel a,mihring kan rawn indaih a,sum leh pai te a rawn indaih a,finna te a rawn sang chho zel a,a that zia leh a hlut zia hria an tam deuh deuh va,reilote ah an rawn let chhuak ta vek mai a ni.Tunah chuan Champhai ah hian High School engemawzat leh College te pawh a awm tawh a,a ram hi a nuam bawk a,Zoram hotute pawhin a sik sa thuah a ram mawina leh nawmna vanga tein Aizawl atangte leh hmun hran hran atangte in lo te an rawn nei nual baw a ni,a than chhoh zel a rinaawm!(a thang thlawt ang).Tunah phei chuan a hmun hi nasa takin a danglam tawh a,Hringlang tlang Mizo pipute mitthi kawng a ‘rahbuk lung’ awmna phei chu Champhai MJA hmalakna hnuaiah hmun nuam tak leh Mizote tana thil pawimawh humhalh nachang an hria hi Mahruaia D.K (a.K.a Sandman) leh a pawlte an fakawm thlawt e!He hmun Hringlang tlang atang hian Rih Dil chu mawi zetin a hmuh theih a lung pawh a leng duh khawp mai.Champhai chuan kum 1997 khan District a hmuh hnuah phei chuan Mizoram District thang chak ber leh thang duang ber pawl a ni ta.A chhunga chengte chu zohnahthlak kan khawchhak ami unaute leh Mizoram zohnahthlak te kan ni a,amaerawh chu inthliarna erawh rilru te ho zingah chuan a la awm!Vai kan tih mai khawthlang lam unaute erawh chu dan mumal fel tak zamna hnuaiah kawla ni chhuak an rawn chhiar vet hung a,mahse Champhai hi Vai dawr awm miah lohna hmun a ni thei mai lawng maw!!!!

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: